Ән – көңілдің ажары. Ән салатын киелі мекен – сахна. Әлемді тыныштықта - мейірімділік пен махаббат тербейді. Қазақтың ән өнері, тіл байлығымыздың кеңдігі секілді өзінше бір әрі мен нәрі бойына тараған қазақы иісі бар, ән әлемінде, өнерде алар белесімізді өрнектеп көрсетеді. Ал аудандық мәдениет үйінен сыналып, бағаланып шығатын, киелі сахнадан шыңдалатын өнерпаздардың өмірдің үлкен белестерінен алар орыны ерекше болмақ. Осындай жас өрендерді шыңдамақ ниетпен қараша айының 3-ші жұлдызында аудандық мәдени-сауық орталығының ұйымдастыруымен Қазақстан Республикасы Тәуелсіздігінің 20 жылдығы аясында аудандық XIV «Арқа үні» фестивалі өткізілді.Аудандық фестивальдің мақсаты мен міндеті- халық шығармашылығы мен жеке орындаушылардың шеберлігін дамыту, талантты орындаушыларды анықтау, жас дарындарды қанаттандыру еді. Фестиваль жас мөлшерінің ерекшеліктеріне байланысты үш кезеңге бөлінді. 3-5 жас аралығындағы кішкентай талапкерлер «Еркетай» байқауында бақ сынаса, ал 6-9 жас аралығындағылар «Күміс қоңырау» байқауы бойынша өнер көрсетті. «Әнші балапан» байқа- уында 10-13, 14-16 жас аралығындағы жас жеткіншектер бар өнерлерін ортаға салып, халықты тамаша әндерімен сусындатты.
